NORMATIVA PARA A PRESENTACIÓN DE COMUNICACIÓNS LIBRES
Recoméndase os/as autores ler atentamente a Normativa e seguir as instrucións que se detallan, antes de redactar o resumen e/ou traballo completo.
O resumo e/ou traballo completo que non cumpra os criterios requiridos non será admitido nas Xornadas.
NORMAS XERAIS:
- Poderán presentarse traballos orixinais aínda que se teñan publicado en revistas, congresos ou en outras xornadas, coa excepción daqueles que desexen optar a premio, neste caso só se admitirán os orixinais que non se teñan publicado con anterioridade.
- As Comunicacións (resumo e/ou texto completo) só poderán enviarse utilizando os FORMULARIOS incluídos na páxina web das Xornadas. Unha vez enviadas, consideraranse definitivas e, polo tanto, non se permitirán modificacións posteriormente.
- O autor ou autora responsabilizase do contido do traballo e, polo menos, un dos asinantes deberá estar inscrito nas Xornadas AGEFEC.
- Todos os traballos presentados deberán estar enmarcados dentro do contexto e papel da Enfermaría de Atención Primaria e Comunitaria.
- As Comunicacións serán avaliadas polo Comité Científico e a súa decisión, non poderá ser obxecto de apelación ou reclamación.
- Aínda que o autor ou autora deberá indicar se opta por Comunicación oral ou Póster, AGEFEC resérvase o dereito a reclasificala, en función da avaliación realizada polo Comité Científico ou por motivos organizativos. A resolución será notificada á persoa que remita a Comunicación por correo electrónico.
- No caso de notificación positiva por parte do Comité, a aceptación non será efectiva ata o pago da cota de inscrición, xustificado e realizado nos 10 días posteriores á notificación.
- Todas as Comunicacións poderán optar a Premio, si así o indica o autor ou autora no campo correspondente ao remitir o resumo da Comunicación, debendo asegurarse de que cumpre os requisitos establecidos.
- Especificacións Premio EIR:
- So se poderán presentar a este premio o traballos fin de residencia rematados en 2017 ou 2018.
- Só se poderán presentar en formato comunicación oral. - Os/as autores ao presentar os seus traballos, comunicacións orais ou póster, entenden que iso implica a aceptación das normas establecidas polo Comité Organizador e/ou polo Comité Científico.
- Os traballos, comunicacións orais ou póster, presentados por algún membro dos comités científico ou organizador, non poderán optar a ningún dos premios das Xornadas.
- As Comunicacións aceptadas polo Comité Científico pasarán a formar parte das Actas da Xornadas. Todos os/as autores/as con Comunicacións aceptadas AUTORIZAN de forma implícita, a súa publicación nos medios que AGEFEC considere mais axeitados para a divulgación das mesmas. Os/as autores/as conservan os dereitos de copyright pero autorizan a súa publicación gratuíta.
CRITERIOS DE AVALIACIÓN DOS TRABALLOS:
Na primeira etapa, que será antes das Xornadas, avaliaranse os resumos presentados, sendo determinante para a admisión ou non do traballo os seguintes criterios de avaliación:
- Estrutura: Está ben estruturado seguindo as normas das Xornadas.
- Prioridade: O tema está dentro do marco da temática das Xornadas.
- Enfoque: Coherencia entre título, metodoloxía e conclusións. Boa orientación e ben dirixido cara os resultados.
- Orixinalidade e aplicabilidade: O traballo é orixinal e aporta coñecementos novos e aplicables á práctica.
- Relevancia: O traballo deberá ser relevante no marco da Enfermaría de Atención Primaria e Comunitaria, ter relevancia para o paciente e para a sociedade..
- Introdución: Descríbense de xeito claro os antecedentes da temática. Razóase a intencionalidade do traballo e as súa aplicabilidade.
- Obxectivo: Está claramente definido. Describe as condicións baixo as cales se debería cumprir.
- Métodos: Son axeitados para acadar o obxectivo que se propón.
- Resultados : Nivel de concordancia entre os resultados e os obxectivos.
- Discusión e Conclusións: Deberán ser coherentes cos resultados.
- Bibliografía: Axustase ao recomendado na normativa xeral das Xornadas.
- Avaliación da presentación durante as Xornadas: Avaliarase a defensa oral.
PREMIOS:
Outorgaranse os seguintes premios:.
COMUNICACIÓNS ORAIS :
- 1º PREMIO: 200 €
- 2º PREMIO: 150 €
- Accésit con diploma acreditativo
COMUNICACIÓN PÓSTER:
- PREMIO: 100 €
- Accésit con diploma acreditativo
1º PREMIO EIR :
- PREMIO: 150 €
- Accésit con diploma acreditativo
PRESENTACIÓN DE RESUMOS
DATAS DE ENVÍO
Deberán ser enviados mediante o sistema on-line de presentación de Comunicacións (resumos) dispoñible na web da Xornada
- A data límite para presentar os resumos será o 18 de Marzo de 2018.
- A data límite para comunicar a aceptación ou rexeitamento, por parte do Comité Científico, será o 25 de Marzo de 2018.
Unha vez aprobado o resumo para a súa presentación na xornada, os autores deberán enviar o texto completo do traballo para a súa avaliación.
- A data límite para remitir os traballos completos será o 1 de Abril de 2018.
FORMATO
Os Resumos deberán respectar o seguinte formato de presentación:
- Non poderá superar os 3.000 carácteres incluídos os espazos (excluíndo título. Autores e bibliografía).
- O titulo deberá ir en maiúsculas, sen abreviaturas, en negriña. O número máximo de palabras será de 15 ( non pode superar as dúas liñas). O tipo de letra recomendado é o formato Arial 12 con interliñado 1,5.
- Admítense ata un máximo de 6 autores, identificados/as con dous apelidos seguidos do nome (exemplo: Pérez Martínez, José, Fernández González, María).
- Mediante superíndices, indicarase a categoría profesional e lugar de traballo. A persoa que presente a Comunicación identificarase como autor/a e deberá incluír un teléfono e enderezo electrónico de contacto.
ESTRUCTURA
- Introdución.
- Obxectivos.
- Métodos.
- Resultados.
- Discusión/conclusións.
- Bibliografía (estilo Vancouver).
Proxecto:
- Antecedentes e estado actual do tema
- Aplicabilidade
- Obxectivos
- Metodoloxía
- Plan de traballo
- Aspectos éticos
- Plan de difusión dos resultados
- Financiamento da investigación.
Caso clínico (limitarase só a comunicacións póster):
- Introdución
- Exposición do caso
- Discusión/conclusións
- Bibliografía (estilo Vancouver).
PRESENTACIÓN DE COMUNICACIÓNS
Será necesario o envío do texto completo do traballo presentado, non só o resumo do mesmo.
Os textos completos deberán ser enviados mediante o sistema on-line de presentación de comunicacións, antes do 1 de Abril do 2018.
Aínda que se aceptara o resumo, se o texto completo non respecta o regulamento de confección será rexeitado.
A Secretaría Técnica indicará o/a autor/a, mediante e-mail, lugar, data e hora da presentación.
FORMATO COMUNICACIÓN ORAL
- O idioma para os traballos poderá ser Galego ou Castelán e deberán remitirse en formato tipo Word.
- A estrutura da será a mesma que o que figura para os resumos.
- Os traballos completos, deberán axustarse ao formato de artigo científico (máximo 4.500 palabras).
- O tipo de letra recomendado é o formato Arial 12 con interliñado 1,5.
- Ao incluír as referencias bibliográficas debe usarse o formato normalizado estilo Vancouver.
- O sistema de apoio para a visualización das Comunicacións será o formato de Power-Point ou PDF.
- A primeira diapositiva deberá incluír a imaxe das Xornadas (descargar aquí), así como o título e autoría da Comunicación.
- O/a autor/a deberá ter entregada a súa presentación audiovisual antes do comezo das Xornadas.
- O tempo máximo para defender a Comunicación será de 10 minutos e deixarase un tempo ao remate de cada quenda para posibles preguntas ou debate. AGEFEC poderá, por motivos de organización e previa comunicación aos interesados, facer cambios ou modificacións no relativo aos tempos de exposición.
FORMATO COMUNICACIÓN PÓSTER
Para a presentación de Comunicacións Póster rexerán as mesmas normas xerais que para as Comunicacións Orais.
- Só se permitiran Póster en formato papel.
- A estrutura será a mesma que se recomenda para os resumos.
- O póster pode ter unhas medidas máximas de 120 cm. de alto e 70 cm. de ancho
- O/a autor/a deberá entregar e pegar o seu póster nos paneis habilitados antes do inicio da celebración das Xornadas.
- O/a autor/a principal ou autores, dos pósters que opten a premio, deberán estar presentes durante a Sesión de Póster (especificada no programa das Xornadas) para a resolución de dúbidas que tanto os asistentes como o comité científico queiran plantexar.
SISTEMA DE PRESENTACIÓN DE COMUNICACIÓNS
Cubra o seguinte formulario. Os campos marcados con (*) son obrigatorios. Ante calquera incidencia, consulte coa Secretaría Técnica.